Ef þú hefur áhuga á að starfa með Brunavörnum Árnessýslu vinsamlega komdu á slökkvistöðina á skrifstofutíma eða hringdu í Pétur í síma 4800-900

Kennslugögn vegna fornáms og þjálfunar slökkviliðsmanna

Samkvæmt reglugerð um Brunamálaskólann og réttindi og skyldur slökkviliðsmannaber slökkviliðsmönnum að viðhalda þekkingu sinni og tileinka sér nýjungar um starfið, meðal annars með námskeiðum og verklegri þjálfun. Til þess að auðvelda slökkviliðsstjórum og öðrum yfirmönnum sem bera ábyrgð á þjálfun í viðkomandi slökkviliði að skipuleggja fornám og þjálfun sinna manna hefur Brunamálaskólinn nú lagt út á vefinn nauðsynleg kennslugögn.

Sjá nánar hér…

Slökkviliðsmenn geta einnig nýtt sér þetta efni til þess að auka þekkingu sína.

Efnið er fyrsti vísir að fjarnámsefni Brunamálaskólans. Um er að ræða glærusöfn og ýmis gögn sem geta nýst slökkviliðum um allt land til að auka þekkingu og færni slökkviliðsmanna. Efnið kemur ekki í stað formlegs náms við Brunamálaskólann en er góð viðbót við þá kennslu sem þar fer fram.

Óheimilt er að breyta efninu nema með skriflegu leyfi Brunamálastofnunar.

Löggilding slökkviliðsmanna

Slökkviliðsmenn, sem sækja um löggildingu til að starfa sem slökkviliðsmenn, skulu hafa lokið lágmarksnámi fyrir slökkviliðsmenn við Brunamálaskólann eða hlotið sambærilega menntun sem skólaráð Brunamálaskólans metur jafngilda. Jafnframt skulu þeir hafa gegnt slökkvistarfi eða starfað við brunavarnir að aðalstarfi a.m.k. í eitt ár samfellt eða starfað í hlutastarfi a.m.k. í fjögur ár.

Slökkviliðsstjóri skal hafa hlotið löggildingu sem slökkviliðsmaður og starfað að lágmarki í eitt ár í slökkviliði sem löggiltur slökkviliðsmaður, eða hafa háskólamenntun með sérmenntun í brunamálum.

Umsókn um löggildingu sem slökkviliðsmaður skal send til umhverfisráðherra. Með umsókn skal fylgja skírteini frá Brunamálaskólanum því til staðfestingar að umsækjandi hafi lokið tilskyldu námi. Einnig skal fylgja með yfirlýsing slökkviliðsstjóra eða annars yfirmanns, eftir því sem við á, um að umsækjandinn uppfylli skilyrði um lágmarksstarfstíma. Telji umsækjandi að hann hafi lokið öðru námi sem teljist sambærilegt námi úr Brunamálaskólanum, skal hann leggja fram vottorð eða prófskírteini um að hann hafi lokið því námi. Auk þess skal fylgja lýsing á náminu.

Þegar við á skal leita umsagnar skólaráðs Brunamálaskólans um hvort menntun umsækjanda geti talist sambærileg námi í Brunamálaskólanum.

Nám-eldvarnaeftirlit

Nám fyrir eldvarnaeftirlitsmenn

Allir þeir slökkviliðsmenn sem sinna eldvarnaeftirliti skulu hafa lokið námi sem eldvarnaeftirlitsmaður I eða lokið sambærilegu námi. Menntun starfsmanna eldvarnaeftirlits skal vera í samræmi við þá þjónustu sem slökkvilið skal veita samkvæmt brunavarnaáætlun viðkomandi sveitarfélags.

Námið skiptist í eftirfarandi þrjá hluta:

Eldvarnaeftirlitsmaður I:Grunnnám fyrir eldvarnaeftirlitsmenn þannig að þeir geti unnið við almennt eldvarnareftirlit. Námið er 70 kennslustundir.
Eldvarnaeftirlitsmaður II:Framhaldsnám fyrir eldvarnaeftirlitsmenn þannig að þeir geti starfað sjálfstætt að sérhæfðu eldvarnareftirliti svo sem að annast lokaúttektir. Námið er 30 kennslustundir.
Eldvarnaeftirlitsmaður III:Framhaldsnám fyrir þá sem stjórna og bera ábyrgð á eldvarnaeftirliti sveitarfélaganna. Námið er 30 kennslustundir.

Eldvarnaeftirlitsmenn skulu sækja a.m.k. eitt viðurkennt endurmenntunarnámskeið á hverju fimm ára tímabili. Hafi slökkviliðsmaður sótt önnur námskeið getur hann sótt um til skólaráðs að fá það metið sem endurmenntun.