003.03.2020. Fundur í Björgunarmiðstöðinni á Selfossi vegna COVID-19

Lögreglustjórinn á Suðurlandi boðaði alla sveitarstjóra á suðurlandi auk forsvarsmanna viðbragðsaðila á fund í Björgunarmiðstöðinni á Selfossi í gær til þess að upplýsa aðila um stöðu mála vegna COVID-19 veirunnar.

Lögreglustjórinn á Suðurlandi fór yfir stöðu mála auk þess sem umdæmislæknir sóttvarna á suðurlandi hélt erindi um veiruna og stöðu mála á henni bæði hérlendis og erlendis.

Eins og staðan var þegar fundurinn var haldinn höfðu 14 einstaklingar á Íslandi verið greindir með veiruna en allir höfðu þeir smitast erlendis. Ekki hafa enn komið fram smit sem hafa smitast milli mann á Íslandi.

Ekkert tilfelli hefur enn komið fram á Suðurlandi en þegar það gerist mun aðgerðastjórnstöðin á Selfossi verða mönnuð allan sólarhringinn, viðbragðsaðilum og stjórnendum sveitarfélaga á suðurlandi til stuðnings og upplýsingargjafar.

Vel var mætt á fundinn sem einnig fór fram í fjarfundakerfi en alls voru níu þátttakendur á fundinum í gegnum slíkan búnað í bæði hljóð og mynd.

Ítarlegar og góðar upplýsingar um veiruna má finna á vef landlæknis og er fólki bent á að leita sér upplýsinga þar um allt sem að henni lýtur.

Alþjóðaheilbrigðisstofnunin heldur uppi kortavefsjá með rauntímagögnum er varðar dreifingu COVID-19. Um áhugaverða upplýsingaveitu er að ræða og vildum við gjarnan deila því með ykkur. Smellið á mynd.

02.03.2020. Aðgerðastjórnstöðin í Björgunarmiðstöðinni á Selfossi

Lögreglustjórinn á Suðurlandi boðaði fulltrúa þeirra viðbragðsaðila sem mest starfa í AST í Björgunarmiðstöðinni á Selfossi til fundar vegna COVID-19 til þess að fara yfir stöðu mála.

Undanfarið haf viðbragðsaðilar verið að fara yfir verkferla og fylgst með stöðu mála undir stjórn lögreglustjóra í samstarfi við umdæmislækni sóttvarna á suðurlands.

Fólki er bent á að afla sér upplýsingar um Kórónaveiruna COVID-19 á vef Landlæknis.

28.02.2020. Vetrartíð á stöðinni

Sem betur fer eru ekki stöðug útköll hjá okkur alla daga og þegar veðrið er eins og það er búið að vera eigum við fjöldann allan af inniverkefnum sem þarf að sinna.

Það er gott að geta gripið til viðhalds búnaðar og húsnæðis, æfinga, skýrslugerða, þrifa og líkamsræktar þegar vindurinn blæs og snjórinn fellur.

20.02.2020. Varðliðið að æfa með körfu- og dælubíl. 

Varliðið að æfa með körfubíl og dælubíl. Dælubíllinn fæðir körfubílinn með vatni. Myndir segja oft meira en 1000 orð, við ætlum að nýta okkur það annað slagið.

19.02.2020. Varðstjóraskipti í Árnesi. 

Sigurður Kárason hefur nú tekið við keflinu af Einari og gegnir hann nú stöðu varðstjóra þar. Sigurður hefur starfað sem slökkviliðsmaður hjá Brunavörnum Árnessýslu um árabil og er öllum hnútum kunnugur í faginu.

Um leið og við óskum Sigurði til hamingju með varðstjóratignina, fögnum við því innilega að fá að njóta starfskrafta Einars og hans reynslu áfram hjá okkur í útkallsliðinu.

11.02.2020. 112 dagurinn

Á 112 daginn komu elstu krakkar leiksskólans Jötunheima til okkar í Björgunarmiðstöðina á Selfossi.

Brunavarnir Árnessýslu, sjúkraflutningar HSU og lögreglan á Suðurlandi tóku á móti þessum frábæru krökkum.